سانپ کے کاٹنے پر شہری نے سانپ کو ہی چبا ڈالا

بہار:بھارت میں نشے میں دھت 65 سالہ شخص نے سانپ کے کاٹنے پر سانپ ہی کو چبا ڈالا جس سے دونوں کی موت واقع ہوگئی۔

بھارتی میڈیا کے مطابق ریاست بہار کے ضلع نلندا میں 65 سالہ دیہاتی راما ماہٹو نشے میں دھت اپنے گھر کے باہر بیٹھا تھا کہ سانپ اس کے پاؤں پر کاٹ کر درخت کے نیچے چھپ گیا۔

نشے میں دھت راما غصے سے بھپر گیا اور سانپ کو نکال کر پہلے اس کے سر پر ڈنڈے سے دس بار ضربیں لگائیں اور جب سانپ مر گیا تو اسے چبا ڈالا۔ اہل خانہ نے یہ دیکھا تو زہر کے پھیل جانے کے خوف سے ڈاکٹر کے پاس چلنے کے لیے اصرار کیا۔

راما جو نشے میں تھا، گھر والوں کی ایک نہ سنی اور اسپتال جانے سے انکار کردیا۔ راما لمبی تان کر سو گیا تاہم کچھ ہی دیر بعد طبیعت بگڑ گئی اور اسپتال لے جانے سے قبل ہی سانپ کا زہر جسم میں پھیل جانے کے باعث راما ہلاک ہوگیا۔

اہل خانہ نے پولیس کو بتایا کہ راما نے سانپ کے بچے کو چبایا تھا۔ پولیس نے لاش کو پوسٹ مارٹم کے لیے اسپتال منتقل کر دیا۔